అపురూపం

నేను చాలా చాలా
అదృష్టవంతుడ్ని సుమా
ఈ ప్రపంచంలో మహా గొప్పవి...
ఎంతో అందమైనవి...
మరెంతో ఉన్నతమైనవి...
ఎన్నో ఉన్నా
వాటిని ఊహలో పొంది తృప్తి పడాలే తప్ప
తాకే అర్హత.. చూసే అదృష్టం కూడా లేదు
అది వెన్నెల్లో తాజ్ మహల్ కావచ్చు...
మానస సరోవరంలో రాజహంస కావచ్చు
కోహినూర్ వజ్రం కావచ్చు
లేదంటే చందమామలోని కుందేలు కావచ్చు
కానీ...
ఆ కోవకే చెందిన నువ్వు
నా మనిషిగా మసిలిన
ఆ అపురూప క్షణాలు
నాకొక జీవితకాలపు
అద్భుతాన్ని పంచాయి
మరో జన్మకు సరిపడా
తీయటి అనుభూతి మిగిల్చాయి
నీ స్పర్శలో వెచ్చదనం
నీ సాన్నిధ్యంలో ఆనందం
నీ మాటలోని మార్దవం
నీ మనసులోని మంచితనం
నీవు పంచిన ప్రేమగుణం
నీవు చూపిన మమకారం
నీలోని ఆత్మీయత
నీదైన అనురాగం....
ఇవన్నీ నాలో
సదా సజీవంగా నిలుస్తాయి
ఎప్పటికప్పుడు నన్ను ఉత్తేజపరుస్తాయి
ప్రియతమా ....
నువ్వు
నా దానివని గుర్తు చేస్తాయి
నువ్వెంతటి అపురూపమో
నా మనసుకు తెలియ పరుస్తాయి
మన బంధమెంతటి
అతిశయమో...
ఈ గుర్తులు వివరిస్తాయి
                   -దీక్షిత్