మజిలీ

ఓ ప్రియతమా...
అందమైన ప్రకృతి కాన్వాసు మీద
అరుదైన రంగులద్దినట్టుగా ఉంది
నిన్ను చూస్తుంటే...
ఈ ప్రపంచానికి నువ్వు కేవలం
ఓ వ్యక్తివి కావచ్చు
కానీ నిన్నే ప్రేమించే నాకు
నువ్వే ప్రపంచమయ్యావు
ఆశలు రేపావు, ఆలోచన నేర్పావు
జీవితంపై అభిలాష పెంచావు
అడుగడుగునా స్ఫూర్తివై నిల్చావు
కొన్నాళ్ళ క్రితం
నాకేమీ కాని నువ్వు
ఇవాళ అన్నీ అవుతుంటే
ఎందుకో ఒకింత ఆశ్చర్యంగా ఉంది
ఇంతలోనే ఏమిటీ వింత.. అనిపిస్తోంది
ఇలా ఆలోచిస్తున్న
నా మనసుకు అంతలోనే
ఒక జవాబు స్ఫురించింది
అనంత విశ్వంలో..
సుదీర్ఘ యానంలో
ఎన్నెన్నో జన్మల మజిలీల మధ్య
ఎక్కడో, ఎప్పుడో...
నువ్వు నాకు తారసపడే ఉంటావని
ఆ రుణబంధమే
నేటి అనుబంధమని !
                   -దీక్షిత్